بتي فوغ

بسم الله الرحمان الرحيم
والصلاة والسلام على اشرف المرسلين

جبتلكم اليوم وصفة للبوتي فور اقتصادية ومقاديرها مضبوطة والنتيجة راااائعة

نحضروه بالزيت لكن مايظهرش فيه ذوق الزيت ولا النشاء بدون اطالة نخليكم مع الوصفة.

المقادير:
3بيضات
كاس سكر عادي حوالي 200غ يعني الكاس المستعمل مايكونش كبير حتى مايجيش البوتي فوغ حلو
بنفس الكاس نكيل كاس ونصف زيت
ملعقة صغيرة خميرة حلوى
فاني
250غ نشا
350غ فرينة انا نستعنل دائما سيم
للتزيين
معجون
علبة شكولة منى بالحليب +علبة شكولة منى سوداء

الطريقة:
لي عندها البيتران تستعملها والا نستعمل الخلاط الكهربائي على اقصى سرعة لان لازم نخلط المكونات جيدا هذا هو سر نجاح هذا النوع من البوتي فور

هذا الكاس لي استعملت

اولا نحرك البيض مع كاس سكر والفاني على اقصى سرعة حتى يولي لون الخليط ابيض هكذا

من بعد نضيف الزيت لكن لازم نضيفها كالخيط كما نعملو في المايونيز ونستمر في التحريك على اقصى سرعة

من بعد نضيف النشا والخميرة والفرينة ونحرك بالملعقة حتى نتحصل على عجينة تكون طرية شوية

ناخذ لابوش ادوي ونحط فيه كمية من العجينة ونشكلها اما على شكل صبيعات او وريدات طبعا الصينية اما ندهنها بالزيت او نفرشها بورق الزبدة

ندخل الحلوى تطيب في فرن يكون مسخن مسبقا على 180 ونراقبها راهي خفيفة تطيب بالخف
بعد ماتطيب وتبرد نلصق كل زوج حبات بالمربى
من جهة نذوب الشكولة في حمام مائي مع شوية حليب لازم تكون الشكولة ثقيلة شوية نغطس الحلوى من جانب واحد ونحطها فوق ورق الزبدة حتى تشيح ونقدمها بالصحة والهناء

وهذا شكله صدقوني ذوقه خفيف وهاااايل

عن قرب اممممم

ان شاء الله تعجبكم الوصفة وتجربوها وتعجبكم

في امان الله