سم الله الرحمان الرحيم
اللهم صل وسلم وبارك على سيدنا محمد عليه افضل الصلاة والسلام اما بعد
المخبز من الحلويات الجزائرية التقليدية نعملوها في الاعراس وكل المناسبات السعيدة لكن بزاااف من الاخوات ماينجحوش في تحضيريه يجيهم يابس وحتى الطلية تبس بالخف
اليوم باذن الله نحطلكم الوصفة بالخطوات المصورة ومع كل اسرار المخبز حتى يجيكم معسل من الداخل وحتى الطلية تبقى طرية
اذن لنجاح المخبز يجب التقيد بمايلي
![](https://lh3.googleusercontent.com/blogger_img_proxy/AEn0k_se5W8oKzCbzdcotZV2AQnh5kgbDyl5KohLhjQJ8m1Ogl4wj6QFef_hdfXYIeaBSzBJ1B1IKmpm7T9bLtZsYDitIJkRZptpRGfGAuk=s0-d)
اللهم صل وسلم وبارك على سيدنا محمد عليه افضل الصلاة والسلام اما بعد
المخبز من الحلويات الجزائرية التقليدية نعملوها في الاعراس وكل المناسبات السعيدة لكن بزاااف من الاخوات ماينجحوش في تحضيريه يجيهم يابس وحتى الطلية تبس بالخف
اليوم باذن الله نحطلكم الوصفة بالخطوات المصورة ومع كل اسرار المخبز حتى يجيكم معسل من الداخل وحتى الطلية تبقى طرية
اذن لنجاح المخبز يجب التقيد بمايلي
1ـ اللوز المستعمل نرحيوه رقيق يعني نفوتوه في السيار لازم يكون رقيق
2ـ نستعمل الزاست نتاع القارص الاصفر لانستعمل الاخضر لان اذا نكثرو منو يعطينا ذوق مر
3ـ الشائع ان اللوز نجمعوه مع السكر بالبيض يعني يستعمل بيضة كاملة وهذا لي يخليه يابس لازم نستعمل 2صفار بيض وبيضة كاملة حتى نلم اللوز لان صفار البيض هو لي يخلي المخبز طري من الداخل
4ـ بعد مانلم اللوز والسكر بالبيض لازم نتحصل على عجينة متماسكة مالازمش تكون طرية لانها اذا كانت طرية كي نطيبو المخبز ماراحش يحافظ على شكله
5ـ كي نحضر عجينة اللوز نعجنها شوية حتى يذوب السكر فيها
6ـ لازم نخلي عجينة اللوز لي حضرناه ترتاح على الاقل3 ساعات ومن الاحسن ليلة كاملة حتى يذوب السكر فيها وتجي معسلة من الداخل
7ـ درجة حرارة الفرن مهمة جدا لازم نطيبوه على150درجة انا شخصيا نديرو يطيب بلا مانسخن الفرن لان كي نسخن الفرن ونحطوه راح يحمار بسرعة مالازمش يحمار لازم يبقى ابيض لان مافيهش فرينة قيس مايطيب البيض فقط
8ـالمخبز نعملوه بالسكر الاحرش لان اذا عملنا السكر الرطب راح يبس لان فيه كمية من النشاء
الان نبدأ في تحضير المخبز بالخطوات المصورة
المقادير:
3كيلات لوز ابيض مرحي رقيق
كيلة ناقصة زوج اصابع سكر احرش
زاست قارص كل 500غ لوز نعملها م ك من الزاست تكون مملؤة جيدا
2صفار +بيضة كاملة حتى نلم اللوز والسكر
فاني
الطريقة:
نحط اللوز+السكر+الفانيالزاست هنا ما لقيتش القارص الاصفر عملت خليط من الزاست اخضر واصفر لكن كيما خبرتكم من الاحسن تستعملو الاصفر
نعجنها شوية حتى يذوب السكر ونحطها داخل كيس ترتاح على الاقل 3ساعات ومن الاحسن ليلة كاملة حتى يذوب السكر
ندخلوه يطيب على درجة150درجة لازم يبقى لونه ابيض هذي نقطة مهمة
شوفوه بعد ماطاب لونه ابيض وبقى محافظ على شكله
نخليه في البلاطو حتى يبرد تماما
الان نحضر الطلية
الطلية:
كاين بزاااف اخوات يشكو من الطلية خخخخ بمعنى كي يعملوها ماتبقاش طرية بمرور الايام
اليوم جبتلكم طلية تبقى طرية لمدة طويلة
والسر في ان الطلية تبقى طرية هو كمية بياض البيض بدل مانعمل بياض بيضة نعمل نصف بياض بيضة
ونزيد نقولكم ان الطلية جامي نعملها بالباتور او الفووي لان راح يعملونا فقاعات هوائية في الطلية نستعمل فقط اليد
اذن نحتاج الى
كيس سكر رطب بحجم 700غ من النوع الممتاز انا استعملت المرجان
نصف بياض بيضة
ماء زهر
عصير ليمون
ملون اختياري
الطريقة:
في اناء نحط السكر لي نكونو غربلناه قبل
نخلط باليد ونضيف عصير الليمون تدريجيا
هنا كيما راكم تلاحظو الطلية عاملة خط غير متقطع معناه انها مازالت ثقيلة نزيدولها شوية عصير ليمون لازم يكون الخط متقطع ولي ماهيش مالفة تعملها تجرب على حبة اذا ساحت الطلية تزيد شوية سكر رطب واذا ثقيلة بزاف تزيد شوية عصير ليمون
الان نضيف الملون لي حبينا بالنسبة للملونات كاين نتاع الغبرة وكاين المستوردة تجي على شكل كريمة هايلة لكن سعرها باهض انا نفضل هذا النوع السائل هايل وسعره معقول احسن من الغبرة لانها تبقى في بعض الاحيان متكتلة
من الاحسن اللون يكون فاتح والورود لي نزينو بها تكون قاتمة نوعا ما
ممكن نعمل البنفسجي يجي هايل
ممكن نعمل البنفسجي يجي هايل
بعد مانحضر الطلية نغطيها ونخليها ترتاح حواي 10د راح نلاحظ ظهور فقاعات هوائية نتيجة الخلط لاحظو الفقاعات الهوائية من فوق
بواسطة راس سكين نخرج الهواء من الفقاعات
نغطس المخبز في الطلية من فوق ونحرك يدي حتى تهبط الطلية من بعد نحطو فوق مشبك يقطر
بعد ذلك ناخذ عجينة اللوز الاصطناعية نعجنها بشوية نشاء نلونها حسب الرغبة ونشكل ورود اما بقوالب السليكون او نستعمل طابع على شكل وردة كيما عملت هنا شكلت ورود بحجمين ولونين
حطيت وردة فوق وردة وحطيت 3 ورود فوق كل حبة من المخبز نستعمل شوية من الطلية قبل مانحط الورود حتى تتثبت
تم بحمد الله
ان شاء الله يكون الشرح وافي وكافي ولا تنسوني غالياتي من صالح الدعاء
في امان الله
ان شاء الله يكون الشرح وافي وكافي ولا تنسوني غالياتي من صالح الدعاء
في امان الله
barak alah fik okhti om amani jazak alah kheir
ردحذفماشاء الله عليك وصفة رائعة وسهلة بارك الله فيك (اختك في الله أم مريم)
ردحذفرووعة ماشاء الله
ردحذف