حلوة السيقار

السلام عليكم غالياتي
جبتلكم اليوم حلوى ذوقها اكثر من رااااائع
بالنسبة للمقادير راح نعطيكم مقادير ل100 حبة طبعا ممكن نعمل نصف الكمية

المقادير:

كيلو فرينة،رطل مرقرين ذايبة وباردة،3 م ك سكر رطب،3 بيض،فاني ،باكي خميرة،ماء الزهر

الحشو:

250غ زبدة من الافضل فلوريال،250غ عسل،250 كاوكاو محمص ومرحي خشن،كمية من حلوة الترك

نحتاج ايضا الى شكولة ولي مول الخاصة بالسيقار

الطريقة:

نحط الفرينة والمرقرين الذايبة ونحرك بواسطة اليد حتى تتداخل المرقرين في الفرينة نضيف السكر والفاني والخميرة وتلم بالبيض وشوية ماء الزهر

نبسط العجينة بالحلال بسمك متوسط وبعرض 6سم

نحط المول الخاص بالسيقار فوق العجينة

ونلف حول المول ثم نقطع

ونحطهم في البلاطو على الجهة لي غلقناه منها

ندخلهم للفرن يطيبو على درجة حرارة متوسطة
بعذ النضج نخليهم يبردو تماما وننزعهم من لي مول
نذوب الشكولة مع شوية فقط من الحليب على حمام مائي
ناخذ بلاطو نحط فوقه ورق الزبدة ومشبك نحط الحلوى فوق المشبك وبواسطة ملعقة نغطي السيقار بالشكولة والكمية لي تنزل من الشكولة نعاود نستعملها

بعد ما نكمل كل الحلوى نخليها تنشف تماما
في هذا الوقت نحضر الحشو
بواسطة الخلاط الكهربائي نخلط الزبدة مع العسل جيدا ثم نضيف الكاوكاو ونحرك وكمية من حلوة الترك والكمية نتاعها على حسب الذوق يعني لي يحب الحلاوة يكثر والعكس
نحط الحشو في كيس حلواني

.

نحشي حبات السيقار

نذوب الشكولة البيضاء فوق حمام مائي على نار هادئة ونحطها في كيس حلواني

نزين الحلوى بخطوط من الشكولة

بعد ماتنشف الشكولة البيضا نحط الحلوى في لي كيسات ونقدمها

للتقريب وليس للتعذيب ههههه لاحظو الكريمة اممممممممم

نتمنى تجربوها لان ذوقها رهيييييب
ملاحظة
هذا الحلوى نحتفظ بها في الثلاجة لان الحشو فيه زبدة باه تبقى متماسكة

لاتنسوني غالياتي من صالح دعائكن ولكن بالمثل
في امان الله