تحلية فاخرة بالجبن

---

السلام عليكم غالياتي
واش راكم اخواتي نتمنى تكونو في احسن حال
علا بالي راني متأخرة اسمحولي كانت عندي ظروف خاصة
هذا اخر تحدي في المسابقة وعلابالكم ان المكون السري هو الجبن لذلك عملت نوع من انواع تشيز كيك راح نحط الصورة النهائية الان لان مابقاش الوقت والنت عندي ثقيلة وباذن الله نحاول نحط كل الخطوات مرفقة بالصور نتمى تعجبكم مشاركتي

هذي صورة مقربة لاحظو الطبقات اممممممممممم

كيما قلتلكم غالياتي هذا نوع من انواع التشيز كيك من دون طهي وفضلت نعمل الطبقة السفلية بيسكوي بالكاكاو بدل البسكويت المرحي مع الزبدة.
اذن على بركة الله نبدأ في الخطوات
الطبقة الاولى:
لتحضير البيسكوي يلزمنا
3حبات بيض،90غ سكر‘30غ كاكاو،60غ فرينة
نخلط البيض مع السكر جيدا حتى يبياض الخليط ثم نضيف الفرينة مع الكاكاو بعد مانكونو غربلناهم ونحرك بالملعقة
نفرش البلاطو بورق الزبدة ونحط الخليط 

ندخله للفرن يطيب على درجة180 درجة وهذا شكلو بعد مايطيب

لتحضير الطبقة الثانية نحتاج الى:
كريم شانتي غبرة انا استعملت 250غ نضيفلها القليل من الحليب فقط ونطلعها بالباتور مانعملوش الحليب كيما متعاودين كي نحضرو الشانتي لازم غير شوية باه كي نحطها في الثلاجة تتماسك

من جهة نحضر كريمة الجبن انا استعملت الجبن الابيض استعملت160غ وممكن نستعمل جبنة كيري

نضيفلو السكر ونحرك بالخلاط الكهربائي

حتى يتجانس ويذوب السكر

بعدها نضيفو لكريم شانتي لي حضرناها قبل

ونحرك بالخلاط باقل سرعة حتى تتجانس نحتفظ بها في الثلاجة
من جهة ناخذ البيسكوي لكونا حضرناه ونقطع دائرة ونحطها داخل هذا المول او cercle ولي ما عندهاش تستعمل المول نتاع الكيك لي يتفتح

ثم نحط خليط الكريمة مع الجبن

ونستفها فوق البيسكوي

ندخلها للثلاجة حتى تتماسك
بعدها نحضر الطبقة الاخيرة وهي ganache الشكولة ونحتاج الى:
200غ شكولة،150 مل كريم فريش
نسخن الكريم فريش فوق النار بعد ما يسخن ننزعو ونضيفلو الشكولة ونحرك جيدا حتى تذوب الشكولة نخليها لعدة دقائق تبرد من بعد نحطها فوق الكريمة

ندخلها للثلاجة حتى تتماسك جيدا لعدة ساعات ومن الاحسن ليلة كاملة
للتزيين
ذوبت شكولة بيضا من دون اي اضافات وحطيتها فوق ورق الزبدة وطيت فوقها خطوط شكولة سوداء وملمع وخليتها لما بردت قطعت بالطابع مربعات وممكن نقطعها باليد اشكال عشوائية
وعملت حلقات بخليط الشكولة البيضا والسوداء وقبل ما تجمد لفيتها كيما الشكل

وزينتها بحبات من المكسرات ودهنتم بالناباج
وهذا شكلها النهائي

والكمية لي بقاتلي من البيسكوي عملت بها تحلية اخرى في الكؤوس
حطيت كمية من البيسكوي المقطع وحطيت فوق الكريمة لي استعملتها في تشيز كيك ثم حطيت فواكه مقطعة وزينت بكريم شانتيي وهذا شكلها

نتمنى تعجبكم مشاركتي غالياتي

في الاخير نشكر كل المتنافسات فلة،فايزة،انا امهم صراحة استمتعت واستفدت الكثير معاهم ونشكر مشرفاتنا الغاليات ونقولهم شكرا لمجهوداتكن جعلها الله في ميزان حسناتكم
بالتوفيق للجميع
في امان الله