بان كيك

بسم الله الرحمان الرحيم

السلام عليكم اخواتي الغاليات
كيف حالكن ان شاء الله الجميع بصحة وعافية.
وصفة اليوم البان كيك وصفة سهلة بسيطة واقتصادية والاهم ان ذوقها هايل
صراحة جربت عدة وصفات حتى لقيت الوصفة المثالية ذوقها مثل الكيك لكن هي تجي رقيقة ،يقدم مع العسل او النوتيلا اوصوص الشكولة وممكن المعجون المهم كل واحد كيفاه يحبه انا شخصيا نفضله بنوتيلا اممممم ولا اروووووع.

المقادير:

3 بيضات
70 غ سكر عادي
50مل زيت
170مل حليب
فاني
باكي خميرة
رشة ملح
200غ فرينة

الطريقة:
بالنسبة للطريقة سهلة فقط نخلط المكونات بالمضرب اليدوي
نخلط البيض مع السكر ثم نضيف الزيت والحليب ونخلط ثم الفاني ورشة ملح واخيرا نضيف الخميرة والفرينة لي نكون غربلتهم قبل مع بعض راح نتحصل على خليط ثقيل شوية يشبه الى حد ما خليط الكيك

ناخذ مقلاة تيفال نحطها تسخن ناخذ كمية من الخليط ونحط يطيب في المقلة بسرعة نشكل دائرة واذا كانت الاخت مبتدئة في المطبخ كي تجي تفرغ الخليط تهز المقلة من على النار حتى تعطيها الشكل من بعد ترجعها تطيب والنار لازم تكزن ناقصة لان البان كيك فيه السكر راح يتحمر بسرعة

راح تبدا تظهر الفقاعات لاحظو

نخلوها تتثقب حتى تولي كيما البغرير هنا نقلبها

لاحظو لونها

على الوجه الاخر نخليها زوج دقائق لا اكثر راح نتحصل على هذا اللون

نحطها على مشبك تبرد ونكمل باقي الخليط هذا الكمية تعملي حوالي من 9 الى 10 قطعة على حسب الحجم

هذا شكلهم بعد ماطابو

هما قدمتهم بصلصة الشكولة

هنا اضفت للخليط كمية من حبيبات الشكولة وقدمتهم بالعسل

ممكن نقدمها مع نوتيلا اممممم وممكن مع كريم شانتيي وكمية من الفواكه يعني كل اخت وذوقها

هذا شكلهم من الداخل

صدقوني ذوقهم رااااائع راح يعجبو الكبار والصغار
في انتظار تطبيقاتكم

في امان الله