ميني سويسرول بكريمة الليمون

بسم الله الرحمان الرحيم

السلام عليكم اخواتي في الله

وصفة اليوم عبارة عن ميني سويس رول بكريمة الليمون ذوقه رااائع وشكله اروووع

بالنسبة لمقادير البيسكوي نعطيكم الوصفة لي معتمدتها

مقادير البيسكوي:

4بيضات

100غ سكر عادي

75غ فرينة

25غ نشاء

فاني

نصف م ص خميرة كيميائية

كريمة الليمون:

100مل عصير ليمون لي ما يحبش الحموضة بزاف كيما انا ممكن نخفف العصير بشوية ماء ونقيس 100مل

120غ سكر رطب

75غ زبدة

زاست حبة ليمون

2حبات بيض كبار

اولا نحضر الكريمة

في حمام مائي نضع جميع المكونات ماعدا البيض ونحرك حتى تذوب الزبدة

من جهة نخلط البيض ونضيفو للخليط الاول ونتركه على نار هادئة مع التحريك بملعقة خشبية حتى تخثار بلا مانخليها تغلي وحتى نعرف انها طابت نضع خط فوق الملعقة اذا ماعاودش تغلق معناها راهي واجدة هكذا

هنا راهي واجدة نخليها تبرد في الثلاجة

من جهة نحضر البيسكوي

اولا نشعل الفرن على180درجة

بواسطة الخلاط الكهربائي نخلط البيض مع السكر والفاني جيدا حتى يبياض الخليط ويتضاعف حجمه

من جهة نغربل الفرينة و النشا والخميرة ونضيفهم على دفعات لخليط البيض ونحرك بالسباتولا من فوق لتحت بلا مانخرج الهواء
ناخذ صينية الفرن نغطيها بورق الزبدة ونحط الخليط نسويه جيدا

ندخله للفرن يطيب انا دائما نشعل الفرن من فوق ومن تحت في نفس الوقت ونخليه 6د وكل اخت والفرن الخاص بها المهم مانخليوهش يحمار حتى نقدر نلفه

نكون حضرنا منديل نظيف ومندي بالماء ونحط فوقه ورق الزبدة هذا الرطوبة تساعد على لفه ونحط فوقه البيسكوي وننزع منه ورق الزبدة هكذا

عادة نلف البيسكوي عرضيا لكن هذا المرة نلفه بشكل طولي حتى نتحصل على ميني سويس رول طبعا نلفه قبل مايبرد

نخليه حوالي 10د حتى يتماسك ويحافظ على الشكل
من بعد نعاود نفتحه ونقطعه طوليا

وندهن كل جزء بكريمة الليمون

ونعاود نرد نروليه كيما كان في الاول

ونقطع كل جزء على 4 او 5 من ميني سويسرول انا قطعته على 5

ناخذ قطعة ورق ونحطها في المنتصف ونرش السكر الرطب على كل قطعة

ونزين كل قطعة بكريمة الليمون في المنتصف امممممممممم

عن قرب

شوفو الكريمة اممممم

بالنسبة للكريمة لي بقات عملت بها تحلية هي عبارة عن تارت الليمون لكن هذا المرة في الكؤوس كنوع من التجديد
عملت الطبقة الاولي صابلي مفتت وممكن نعوضه باي بسكويت من بعد الكريمة وفوقها المورانغ

بواسطة الشاليمو الخاص بالمطبخ نحمر المورانغ من فوق

شوفو شكلها ما احلاه والطعم مانحكيش

ملاحظة:
بالنسبة للكريمة هذا المقادير لاتكفي لابد ان نضاعف المقادير ولي بقى نعمل به هذا التحلية

تم بحمد الله

ان شاء الله تعجبكم الوصفة وتجربوها وتنجحو فيها ولا تنسوني اخواتي من صالح دعائكن ولكن بالمثل
في امان الله