مقروط روايال

السلام عليكم اخواتي
مقروظ رويال وصفة جديدة و هو عبارة عن مقروظ اللوز في حلة جديدة يجي محشي بالبيستاش ملائم للاعراس والمناسبات السعيدة ادام الله الافراح في كل البيوت





المقادير:
3كيلات لوز مرحي رقيق
نصف كيلة سكر احرش
زاست ليمون نكثرو منه لان هو لي يعطيه البنة ونستعمل الليمون الاصفر لان الاخضر اذا كثرنا منه يعطينا ذوق مر
فاني
بيض وصفار بيض

الحشو:
3كيلات بيستاش مرحي
كيلة ناقصة شوية سكر احرش
فاني
ماء الزهر

لتحضير السيرو نحتاج الى:

3كيلات ماء
كيلة سكر احرش
عصير ليمونة

نحتاج ايضا الى

سكر رطب
عجينة اللوز الاصطناعية
ملون اخضر ووردي

الطريقة:

اولا نحضر مقادير اللوز

نخلط اللوز والسكر والفاني وبشر الليمون ونجمع بالبيض نستعمل بيضة كاملة مع صفار بيضة حتى نتحصل على عجينة متماسكة نعجنها قليلا باليد حتى يذوب السكر نغطيها ونخليها ترتاح في الثلاجة عالاقل 3 ساعات

من جهة نحضر مقادير الحشو

نخلط المقادير السابقة ونضيف تدريجيا ماء الزهر مالازمش نكثر قيس مايتلم الحشو كيما نعملو في حشو التشاراك

نرش طاولة العمل بشوية نشاء ونشكل حربوش من عجينة اللوز لي حضرنا وحربوش اقل سمك من حشو البيساش

نفتح حربوش اللوز ونحط داخله حربوش البيستاش

ونعاود نغلقه

نقطعه مقروظات

نحطه في بلاطو فوق ورق الطهي ونثقب كل حبة في المنتصف

ندخله للفرن على150درجة لازم يبقى لونه ابيض
بعد الطهي نخرجه من الفرن ونخليه يبرد تماما
في هذا الوقت نحضر السيرو بخلط السكر والماء نحطهم فوق النار على درجة متوسطة لمدة 15د نضيف عصير ليمونة
بعد مايبرد السيرو نحط الحلوى داخله ونحطها تقطر
ناخذ كيس نحط فيه السكر الرطب بعد مانكون غربلناه ونحط فيه الحلوى

نغلق الكيس ونحرك نحط حبات الحلوى فوق مشبك حتى تجف
بعدها نعاود نحطها في السكر الرطب وهذا المرة نستعمل اليد ونضغط حتى السكر يتثبت فوقها وبواسطة الاداة لي استعملتها في ثقب الحلوى من فوق نعاود ننزع السكر الموجود داخل الثقب
لتزيين الحلوى نحتاج الى عجينة اللوز الاصطناعية جزء نلونه بالاخضر وجزء بالوردي وراح نحتاج الى طابع السليكون على شكل وردة وطابع الورقة

نشكل اوراق بالعجينة الخضراء ونثبتها فوق الحلوى بشكل مائل
نحط كمية من عجينة اللوز الوردية داخل مول السليكون

نثبتها في الثقب لي عملناه فوق الحلوى
نحط الحلوى داخل حاويات ورقية ونزينها بالملمع الفضي وهذا شكلها النهائي

عن قرب

نتمنى تعجبكم الحلوى ولا تنسوني غالياتي من صالح دعائكن
في امان الله