مورانق

بسم الله الرحمان الرحيم

الحمد لله فاتحة كل خير وتمام كل نعمة والصلاة والسلام على نبينا وحبيبنا محمد صلى الله عليه وسلم اما بعد......

الكثير منا يحب المورانغ لكن القليل لي ينجح في تحضيرها اليوم جبتلكم طريقة جديدة وباذن الله ناجحة من اول مرة .
اغلب الوصفات المتداولة يقولك بياض 2 بيض مثلا ويعطيك كمية السكر لكن كاين لي ماينجحش فيها رغم ان التزم بالخطوات هذا لان حجم البيض مختلف هذا لي يعمل الفرق
بالاضافة ان احيانا كي نعمل حلويات نحتاج فيها صفار البيض فقط راح نحتفظ بالبياض في المجمد وممكن ننسى حتى شحال من بياض بيضة احتفظت به ويكون سبب في ان ما نستغلش بياض البيض لي عندي ونعمل به الومرنغ
لذلك جبتلكم وصفة ساهلة ومضمونة وحتى اذا عندنا بياض بيض في المجمد نستعملوه عادي مهما كان حجم البيض صغير او كبير وهذا شكل المورانغ لي حضرت شوفو ما احلاه على فكرة من كثرة ماعجب لاولادي عاودتو 3مرات في اسبوع واحد

طلعتلهم السكر خخخخخ

المقادير:
اولا اذا راح نستعمل بياض بيض كان في المجمد نجبده قبل حتى ياخذ حرارة المطبخ
نحتاج كمية من بياض البيض ونوزنها ونعمل ضعف وزنها سكر عادي راح نعطيكم مثال حتى تستوعبو الفكرة

مثلا:
ناخذ 3 بياض بيض ونوزنها راح نلقاه مثلا 150غ راح نعمل راح نعمل300غ سكر عادي ok

الطريقة:

اولا نشعل الفرن على100درجة مئوية
نحط بياض البيض لي وزناه مع ضعف وزنه من السكر في اناء معدني

نحط الخليط فوق حمام مائي يعني ناخذ طنجرة مثلا ونحط فيها الماء بعد مايغلي نقص على النار ونحط خليط البيض والسكر ونحرك يدويا بالفووي هنا ما نستعملش الباتور
نحرك جيدا حتى يذوب السكر تماما حواي من 4الى 5د لا اكثر

هذا شكل الخليط بعد ماذاب السكر

الان لي عندها البيتخا تستعملها ولي ما عندهاش تستعمل الباتور
نبقى نحرك في الخليط لمدة 10دقائق على اقصى سرعة حتى يبرد الخليط تماما ويطلع بياض البيض ويولي يبرق هنا نضيف شوية فاني

ناخذ صينية الفرن ونحط فوقها ورق الزبدة ونثبت اطراف الورقة بشوية فقط من المورانغ من الاسفل
ناخذ لابوش ادوي ونشكل المورانغ بالشكل لي نفضلوه

نخليها تطيب من ساعة ونصف الى ساعتين على حسب الفرن وحجم المورانغ المهم حتى تنشف من الداخل
نخرجها من الفرن ونقدمها بالصحة والهناء

عن قرب

شوفو لونها من الاسفل لازم يبقى ابيض

ملاحظة:
هذا المورانغ يمكن استعمالها في تارت الليمون وصابلي المورانغ وكل الحلويات والتحليات لي فيها المورانغ والنتيجة رووووعة
هما عملت بها هذا التحلية

ان شاء الله تجربوها وتنجحو فيها ولاتنسوني من صالح دعائكن

في امان الله